لغة Html5 ماذا تقدمه لنا وما المميز فيها

التفاصيل

الزيارات: 11116

خلال الفتره الماضيه أكيد الكل سمع عن ال html5 و كل فترة و التانيه بيحكوا انو هالشي حيغير طريقه تعاملنا مع الانترنت بس يا ترى شو هية ال html5 ؟ و ليش اخدت كل هالضجة خلال هالكم سنة الماضية ؟و ليش مهم بالنسبة الك انك تعرف عن ال html

قبل ما نحكي عن ال html5 خلينا نحكي شوي عن ال html بشكل عام هالكلمة هيه اختصار ل HyperText Markup Language و هيه وحدة من اهم الركائز ل ايا موقع انترنت. بشرح مبسط و مختصر هيه متل برنامج ال word يلي بتسخدمو ل تنسيق المقالات و الصور. HTML بدون ايا شي تاني مانها كافيه لانو اذا بدنا نشتغل موقع HTML بدون ايا شي تاني ف حيكون الموقع بسيط كتير و يلي رح شوفو انا متل يلي رح تشوفو انت مو متل ال facebook صفحتي مختلفه كليا عن صفحتك. فبالمختصر ال html مجرد لغه ل عرض و تنسيق الصور و النصوص.

بالسنوات الماضيه شفنا طفرة تكنولوجيه كبيره و بخلال كذا سنه زادت سرعة الكمبيوترات و كروت الشاشة صارت اقوى و سرعه الانترنت تزايدت اضعاف و اضعاف. بس HTML بقيت متل ما هيه و ما واكبت هالتطور قبل ال HTML5 كانو المبرمجين يشتغلو على HTML4 يلي انشغلت قبل حوالي ١٥ سنه او XHTML يلي هية تطوير بسيط ل HTML4 اتطورت عام ال ٢٠٠٠. بسبب هالشي بلشو المبرمجين يستخدمو plugins ل تساعد ال HTML انها تعرض شغلات ما بتقدر ال HTML لحالها تعرضها كآكبر مثال على هالشي كلنا منعرف FLASH و سمعانين عن FLASH Plugin مشان تشلفك شي فيديو. و كامثله تانيه Silverlight او Java كل هالتقنيات و غيرها نزلت ل تحاول تساعد ال HTML انها تعرض شغلات ما فيها لحالها تعرضها.

هالشي خلق مشكله كبيره بسبب كتر الشركات يلي بلشت تنزل Plugins و هالشي ما كان محسوب حسابو صار في مشكله تنسيق بين شركات المتصفحات و انو يطلعوا ب قوانين و خصائص موحدة. تقنينا يفترض إذا فتحت الموقع ب Firefox او ب Chrome او Internet Explorer الموقع يكون نفسو ب ايا متصفح. بس مشكله ضعف التنسيق خلت كل متصفح يتبع ال Standard يلي بيشوفو مناسب فهالشي شكل مشكله لل web developer بحيث الموقع بلش يطلع ب شكل على هالمتصفح و بشكل تاني على متصفح تاني فانجبر ال web developers انهن يضيفو كذا code بحيث يدعمو ال standard تبع كل متصفح بحيث الصفحة الناتجة تعطي نفس الاظهار على كل المتصفحات.
مشكله تانيه ظهرت و هية انو المواقع يلي بتتطلب Flash Plugin او Java … الخ بلشت تستخدم المعالج و الذاكره بشكل كتير اكبر خصوصي إذا فتحت كزا صفحة بتتطلب فلاش حتلاقي ال CPU بلشت تشتغل اكتر و Memory كل مالها عم تقل. هالشي واحد من الاسباب يلي خلى شركه Apple توقف دعم الفلاش ب Safari و ال iPhone و iPad لاحقاً لانو زياده CPU يعني زياده صرف بطاريه ف كانو عم يحاولوا يطولو عمر البطاريه اضافة ل اسباب تانيه ما بتندرج تحت موضوعنا اليوم.

ال HTML4 عملت كتير خلال السنوات الماضيه و شفنا تطور سريع لل web و الها فضل كبير بهالشي بس اكيد ال HTML4 كان الها كذا مشكله ففريق التطور ل HTML5 حاولوا يلاقوا كل هالمشاكل و يتخلصوا منها بالاصدار الجديد من ال HTML ف طلعو ب كذا قانون :
١- اعتماد اقل على ال Plugins بحيث ال HTML5 لازم تكون عندها قدرة عاليه انو ال Developers يستعملوها ل يعرضوا صفحة الانترنت بدون الاستعانه بال Plugins
٢- اعتماد أقل على نوع النظام أو نوع المتصفح بحيث لازم الموقع يلي بيستخدم HTML5 اذا بتتصفحوا من Chrome يكون نفسو اذا بتتصفحوا من Firefox بدون ما يعتاز المبرمج انو يكتب كود اضافي ل كل متصفح
٣- يشتغلو ال HTML5 قدام كل العالم و ياخدوا بالمشاكل و النصائح يلي بتعطيها ياهن العالم بحيث ما يقدموا شي جاهز يحاولوا اكتر يقدموا شي حيحل مشاكل ل كل العالم باختلاف مشاكلهن.

ال HTML5 لسا عم تنشغل و المتوقع ال HTML5 تكون ١٠٠٪ خالصه بال 2014. بس من هلآ بلشنا نشوف النتائج و تقريبا كل المتصفحات بلشت بدعم ال HTML5 و صار بإمكان ال Web Developers يستخدموها ليشتغلو مواقع انترنت من اليوم. بس طبعاً مو كل المتصفحات عم تدعم ال HTML5 متل بعضها و لسا في متصفحات متأخره عن غيرها ف لسا ال Web developers حيشتغلوا موقعهن بحيث يدعم ايا شي بيدعموا المتصفح يلي عم ينعرض موقعهن عليه و اذا ما بيدعم المتصفح الميزه واحد لازم يعرضوا شي بديل بحيث يضل موقعهن عم يشتغل حتى لو المتصفح ما بيدعم الميزه المطلوبه.

ليش ال HTML5 مهمة الك ؟
كمستخدم للانترنت أكيد عانيت بدون ما تحس من ال HTML4 متل الموقع كتير بطئ او المتصفح عم يعلق بس تفتح كذا موقع مع بعضهن او تفتح الموقع الفلاني و يقلك لازم تحمل Flash Plugin آو لازم تعمل Update لل Java Plugin . او مثلا تفتح موقع تسمع مروحة الجهاز بلشت تشتغل و جهازك مدري شو صرلو و حمي كونو الموقع المفتوح عم يشتغل ٣ او ٤ Plugins بنفس الوقت. اضافه لهلشي لما تتصفح انترنت على موبايلك البطاريه ما رح تخلص بساعة او ساعتين.

ال HTML5 حتحللك كل هالمشاكل كونو حيكون قليل الاعتماد على ال Plugins و ال HTML5 صار بامكانها تشغل فيديو او ملفات صوت او حتى رسم ثلاثي الابعاد بدون الاستعانه ب ايا Plugin و كونو ال HTML5 حيكون الها Standard معين حنصير نشوف المتصفحات حتقدر تعرض المواقع بسرعة اكبر و المواقع معد تستهلك CPU او بطاريه متل ما كانت تستهلك قبل.

بالنهايه باستخدام ال HTML4 شفنا ال Web Developers قدروا يعملو كتير شغلات حلوه مع كل المشاكل يلي كانو عم يعانو منها هلآ باستخدام كل هالتقنيات الجديده لنشوف شو ممكن يعملولنا.

اذا حابين تتعلمو او تعرفوا اكتر عن HTML5 هالموقع كتير مفيد
http://www.w3schools.com/html/html5_intro.asp
لا تنسوا تشاركونا برآيكن او اذا عندكن ايا سؤال عن الموضوع اكيد حنعمل جهدنا نجاوبكن


المصدر : الباحثون السوريون Syrian researchers

• < السابق
• التالي >